智利喪攻阿根廷 終極決戰打「大」交

猪拉多纳

美洲國家盃聽朝迎來終極大戰，智利、阿根廷會師聖地亞哥爭奪冠軍殊榮！雖然話決賽通常都踢得保守啲，之不過南美球隊向來崇尚進攻，計落已經連續3屆決賽順利開出入球大。呢鋪智利同阿根廷要爭住改寫歷史，仲邊肯放軟手腳先？況且雙方後防同時有隱憂，咁嘅情況梗係追2.15倍入球大。

（now681台周日凌晨4:00直播）

喺美洲盃史上，一共有7隊波試過高舉冠軍，但就偏偏冇智利份。難得呢支東道主迎來「黃金一代」，三線各有阿歷斯山齊士、維達爾、哥迪奧巴禾等人孭飛，令全國上下都寄望佢哋可以捧盃創造歷史。呢班波亦冇令人失望，以5戰入13球最強火力姿態殺入決賽。

雖然A山報稱受傷，但為咗開創紀錄，相信呢位硬漢都會落場搏殺，加上拍檔伊度亞度華加斯亦要為爭神射手而戰，預料智利會繼續搶攻爭冠軍。之但係中堅干沙路查拉停賽令後防出現隱憂，皆因頂上嘅荷西洛查士速度麻麻，上仗應付秘魯就話搞得掂啫，呢鋪對住美斯、阿古路等扭得爆得之人，好易出事喎！
智利替工

嘜唔掂阿古路

另邊廂嘅阿根廷聽朝只要登頂，即可打破球隊22年大賽獎盃荒，仲可以追平烏拉圭，齊齊以15次奪冠次數並列南美第一，足以撫平上年飲恨世界盃嘅傷痛。話就話主力美斯今屆賽事入波唔多，但佢專注助攻反而造就阿古路、迪馬利亞更易開火，火力點分散令對手防不勝防。
阿根廷加雷腸胃炎

不過佢哋後防同樣遇上麻煩，中堅加雷因腸胃炎缺陣4強對巴拉圭一戰，佢前日先復操單獨訓練，狀態成疑，今仗無論派佢定老將迪米捷利斯落場，相信都好難頂得住A山、伊度亞度華加斯呢班老鼠仔輪流衝擊，想中止連續3仗鬥智利失守嘅紀錄唔易囉！