商業宣傳多過練兵 多蒙特川崎做「大」騷

猪拉多纳

唔經唔覺，歐洲各路勁旅又開工，準備下個月展開嘅新球季，德甲嘅多蒙特今晚遠涉重洋去到日本，同日職嘅川崎前鋒拍跳，表面睇係為咗練兵，實質上係宣傳做生意，呢類應酬性質嘅友誼波，都係博中位數3.5球嘅1.75倍入球大着數。（開賽時間：周二晚6:00）
一落機做訪問探足校

由新主帥杜曹揸旗嘅多蒙特，今次出足人嚟遠東做親善訪問，會去日本、新加坡、馬來西亞轉一圈，期間踢兩場表演賽，今晚就係第一場。點解佢哋揀呢3個國家？原來因為多蒙特舊年响呢3個地方設立咗辦事處，希望拓展亞洲業務，呢次東行完全係為做promotion，所以佢哋尋日一落機，唔單只嗌咗恩莫比尼、曉姆斯出席記招做訪問，仲响傍晚派人去多蒙特足球學校東京分校氹細路，今日賽前一個上晝，又要兵分兩路出席活動，佢哋班人時差都未搞掂就咁頻撲，季前備戰又剛剛要開始，根本唔可能打真軍。

川崎嗰邊恐怕亦唔好得幾多，佢哋係就係喺球季中段，作戰狀態比較好，但係嚟緊個禮拜六佢哋要响聯賽主場對FC東京，無謂喺場表演賽死嚟，何況佢哋賽前推廣呢場波嘅方向，主要係谷特刊、T恤、頸巾呢啲產品，似係做生意多過踢波，肯定唔會搏命，呢啲咁嘅熱身賽，大家只求氹得Fans happy，做入球show嘅可能性好大。