哥斯達黎加半場Ｗ夠「薩」

猪拉多纳

雙箭齊發博開齋

美洲金盃B組，哥斯達黎加對薩爾瓦多，哥軍由一代射手雲祖柏執教下，踢法果然豪邁，首仗同牙買加鬥攻，打和2比2。事實上，哥斯達黎加中前場人腳鼎盛，兩位射手祖爾甘保、拜仁雷斯具級數，為求喺今屆賽事開齋兼贏波，一開勢必喪攻薩爾瓦多，哥斯達黎加半場W抵玩。（周日早上9時開賽、馬會網上文字直播）

哥斯達黎加上年世界盃打入8強，證明球隊並非泛泛之輩，當時擔任助教嘅雲祖柏，年初升職擔正做領隊後，更積極提升攻力，效果顯著，上月熱身賽對歐洲一線球隊西班牙，都能夠取得入球就知唔嘢少。

講到哥斯達黎加最強武器，必數兩位前鋒祖爾甘保同拜仁雷斯，前者近年被阿仙奴外借去貝迪斯、維拉利爾等球隊，都有唔錯表現。拜仁雷斯効力過富咸、燕豪芬等歐洲球會，日前落實加盟葡超勁旅士砵亭。鑑於兩位孭飛球星喺首輪仲未有波入，今輪遇弱肯定搶韁求開齋，幫球隊早早鎖定勝局。
薩爾瓦多用土炮頂唔住

雖然哥斯達黎加後防冇以前咁穩陣，但今場對手只係薩爾瓦多，相信防線所受威脅唔大，更有利雲祖柏採取進攻戰術。

反觀薩爾瓦多以本土聯賽球員為主，人腳質素明顯較遜，最大問題係唔識入波，上仗只能同加拿大打和0比0。近期熱身賽對危地馬拉、洪都拉斯之流，都入唔到波，好難奢望佢哋可以喺哥軍身上搵到着數，踢半場就已經失守。