銀河加料搶頭炮

猪拉多纳

每年最矚目嘅季前熱身賽──國際冠軍盃聽朝隆重揭幕，打頭陣係由美職勁旅洛杉磯銀河主場迎戰墨超球隊CF阿美利加，啱啱向銀河報到嘅前紅軍隊長謝拉特如無意外今仗會迎來自己為新東家嘅處子騷，撞正狀態成疑嘅CF阿美利加，謝老四梗係要施展渾身解數，攞頭威冧粉絲，平手盤揀銀河。（有線61及201周日早上11時30分直播）
拍羅比堅尼火力猛

今季轉戰美職嘅利物浦傳奇球星謝拉特，有邊個球迷唔識佢？不過呢句說話放喺美國就係另一回事。話說謝老四日前出席新東家銀河嘅操練，同前紅軍隊友羅比堅尼齊齊熱身，點知有個記者居然分辨唔到佢兩個，係咁問行家謝拉特係乜嘢。雖然美國對足球運動愈來愈重視，但連鼎鼎大名嘅謝拉特都認唔到咁冇面，呢位初來甫到嘅銀河新援都要加多兩錢肉緊，向美國球迷同傳媒騷吓哥利。

斯維唔會懷疑謝拉特嘅職業態度，佢已經講到明佢加盟美職唔係度假或養老，仲話要學萬人迷碧咸咁為銀河作出最大貢獻。查實呢支上屆美職總冠軍實力強勁，淨係射手羅比堅尼嘅級數已超晒班，喺前隊長當路雲掛靴後，呢位愛爾蘭老將成為前線第一火力點，上場聯賽贏FC多倫多連中三元，連同阿倫哥頓、祖連奴、列基等射手輪流發威，令銀河今季暫時以31個士哥冠絕美職，依家多埋謝拉特，簡直如虎添翼。
阿美利加狀態成疑

CF阿美利加自從上季季後賽輸畀帕丘卡8強出局後，已差不多兩個月冇正式比賽，狀態唔慌好得去邊，而且佢哋任命克雷塔羅教頭安比斯為新帥，球員亦要重新適應。與未開咧嘅CF阿美利加相比，銀河一路踢緊聯賽，狀態贏佢成條街，最重要係佢哋主場出擊特別「恐怖」，齋計近4仗喺自己地頭作戰全勝之餘，仲狂轟20粒，火力全開唔係人咁品。況且呢場係謝拉特効力銀河嘅首騷，為開靚個頭當然唔衰得，整定CF阿美利加冇運行，平手盤梗係於捧銀河響頭炮。