侯克爆紅幫辛尼特劏「車」

猪拉多纳

邊個歐洲主流聯賽最早開咧？咪就係俄超。今晚上演嘅俄羅斯超級盃，由上季聯賽盟主辛尼特主場火併盃賽冠軍莫斯科火車頭，為新一季俄超揭開序幕。辛尼特前鋒侯克近期成為網絡紅人，頻頻做出射穿網、抽爆波等「暴行」出晒位，破壞力極強，火車頭撞正呢位堅暴力嘅「變形俠醫」聽遭殃喇，不妨直取辛尼特讓球主勝。（周日晚11時開賽）

講起辛尼特，斯維就即刻諗起「變形俠醫」侯克，呢位辛軍最具星味前鋒，唔知係咪因落選巴西美洲盃大軍谷埋成肚火，今夏頻頻做出「驚人」之舉，佢練波嗰陣施展衝力射球，連人帶波射穿網，之後仲流出佢一腳抽爆咗個波嘅片段，雖然假假哋，但都係話佢腳頭勁！除咗腳頭重之外，侯克嘅手力一樣咁「恐怖」，佢試過打機輸咗，嬲到掟手掣竟掟到牆都爛，非常兇殘，呢幾段片於網上hit爆，依家邊個行近呢位「破壞之王」都好危險。

查實辛尼特喺近5季俄超非冠即亞，其中3度封王，包括上季於葡萄牙少帥保亞斯帶領下重奪冠軍，呢位「莫連奴二世」今季只係放走防中老將泰摩斯卓克，更簽入莫斯科斯巴達前鋒迪斯奧巴同馬體會守將安沙迪，配合侯克、基沙哥夫、查維加西亞等猛將，實力有增無減。
火車頭級數差一截

另一邊廂，上季贏得俄盃嘅火車頭只屬二流貨色，聯賽只排第7，雖然今夏羅致羅斯托夫新仔基哥耶夫，但陣中較出名嘅哥魯卡、文奴費南迪斯等都過晒氣，點同班霸辛尼特相提並論呀？況且辛尼特少帥保亞斯一向要威，加上愛將侯克近期咁癲，梗係想搵火車頭祭旗開個靚頭喇，斯維認為辛軍坐底贏兩粒，讓球主勝咪錯過。