紐約城當頭起 強襲多倫多

猪拉多纳

韋拿仲有火，勒唔住！

美職開始匯聚全球星光，紐約城今晚喺主場對FC多倫多，雖然有林柏特未踢得，唔能夠同韋拿「合體」出擊，但多倫多冇咗艾迪杜里同米高巴特利，剩低基奧雲高根本冇辦法「變身」，戰鬥力難免大減，寧買當頭起，梗係捧1.8倍紐約城主勝啦！（TVB301台周一凌晨3:00直播）

原本紐約城官方宣布，37歲嘅林柏特準備好喺今晚上陣搏殺，可惜最後竟然撻Q，因為林柏特喺操練期間，覺得小腿有啲唔妥，為保險計決定推遲登場日期，不過新加入美職嘅紐約城，其實最近已開始站穩陣腳，近5場聯賽更加有4勝1負靚績，照個勢睇，季後賽要預埋佢哋至得。
上仗梅開二度

一見派路笑晒口

事實上，韋拿知道可以同林柏特及派路拍住上，嚟緊會有更多彈藥爭取士哥，似乎都好興奮，早排佢一收到風知派路駕到，佢仲即刻四萬咁口去打聲招呼添，可見韋拿都仲好有火，勁緊張紐約城嘅成績。咁呢點應該同韋拿開始上力有關，呢件前西班牙國腳入球數字直線上升，包括上星期紐約城作客以2:1砌低蒙特利爾衝擊，個人仲梅開二度，遲啲韋拿、林柏特同派路「合體」，威力肯定唔講得笑，淨係諗吓已經令人好期待。
多倫多超殘陣

4將踢太公波

對家FC多倫多就慘咯，上星期佢哋作客慘吞洛杉磯銀河4蛋，最主要原因係多倫多個陣太殘，除咗莊拿芬奧蘇里奧同艾殊頓摩根入選加拿大國家隊，艾迪杜里同米高巴特利都要為美國國家隊出戰美洲金盃，得番基奧雲高1個人撐起大局，冇得「變身」隨時又要做沙包，擺低3分走人。