韋斯咸搶胡食魚腩

猪拉多纳

歐霸盃第二圈外圍賽首回合賽事今日開打，阿King揀咗英超代表韋斯咸同大家分析，「錘仔幫」主場迎戰馬爾他球隊拜基卡拉，馬爾他一向被視為魚腩部隊，咁馬爾他入面嘅球會，仲唔係魚腩中嘅極品？韋斯咸主場梗係要盡炒對方攞威，讓兩球照捧讓球主勝！（周五凌晨2時45分開賽）

韋斯咸喺第一圈外圍賽又係首回合踩行油，大炒安道爾球隊路施坦斯三蛋，兩回合計贏4比0出線。「錘仔幫」今場雖有前鋒迪亞法沙高坐波監，但新帥比歷話未驚過：「我相信麥克盧保、路蘭等一班中場可以分擔到前面入波嘅責任。」其實「錘仔幫」今夏擴軍積極，其中從馬賽高價簽入翼鋒皮耶最令人期待，此子上季為馬賽交出七個入波同十七次助攻，今場對住魚腩梗係要騷哥利！拜基卡拉陣中只得前祖雲達斯前鋒米高利叫做有卡士，可惜佢都三十六歲，面對韋斯咸惡唔出樣，拜基卡拉實力係有限公司，能夠出線第二圈外圍賽已經係超額完成，今場都係乖乖地聽炒喇！
洛辛堡求穩陣吼細

另外阿King想講吓愛爾蘭球隊沙姆洛克流浪主場對戰挪超球隊奧特足球會呢場波，主隊近日簽入名將杜夫，可惜呢位三十六歲老將有傷在身，今場未能替球隊上演地標戰。沙姆洛克流浪實力雖然較弱，不過奧特足球會近期狀態亦唔掂，近三場不勝，今場作客讓唔起對方，一於博讓球主勝。至於另一支挪超隊伍洛辛堡則要作客冰島嘅雷克雅維克，洛辛堡今場有後衞列根尼奧臣同中場艾利韋夏姆臣因傷上陣成疑，加上今場作客，洛辛堡或會以穩陣行先，細盤值捧。