韋斯咸「讓主」碌爆「卡」

猪拉多纳

歐霸盃第2圈外圍賽首回合繼續有英超球隊出場，韋斯咸會喺主場迎戰馬爾他球隊拜基卡拉。佔地利嘅「錘仔幫」雖然有前鋒迪亞法沙高要坐波監，好在佢哋亦有大把新球員未登場，新領隊比歷已經落咗Order要其他球員分擔入波重任，新兵大晒冷「讓球主勝」-2都抵撐。（開賽時間：周五凌晨2:45）
拜基卡拉唔齊腳

韋斯咸喺上一圈兩回合計以4:0輕鬆砌低路施坦斯，除咗新簽入嘅伯明翰門將戴倫蘭杜夫獲派正選把關之外，森多利亞中場奧比安、馬賽中場皮耶同咸美頓後衞史提芬軒祖都仲未登場，加上近日再簽埋祖雲達斯中堅奧邦拿同阿仙奴右閘贊堅臣，兵源咁充足，就算迪亞法沙高停賽都冇有怕，主場出擊大把本錢炒起拜基卡拉打好個底。

以為「錘仔幫」增兵行動咁就完？未喎！佢哋近日再開價900萬鎊斟曼聯前鋒查維亞靴南迪斯，擺明想人多好辦事，喺英超、歐霸盃雙線作戰！對家馬爾他球隊拜基卡拉，喺上一圈兩回合以3:1淘汰烏利錫斯，兩隊波都名不經傳冇乜參考價值，不過拜基卡拉係就係有踢過帕爾馬嘅米高利孭飛，可惜亦有門將夏巴養傷、前鋒泰倫斯維拿停賽，唔齊腳造訪倫敦好難有運行。