備戰充裕搞掂轉會 阿積士上力o趙狼堡

猪拉多纳

除咗曼聯同利物浦分途出擊外，今晚熱身賽仲有場「阿二鬥阿二」，由荷甲亞軍阿積士主場恭候德甲亞軍禾夫斯堡。考慮到阿積士備戰時間比較充裕，加上一早處理好轉會問題穩定軍心，呢鋪對住仲煩緊主力出走嘅狼堡值得睇高一線，2.7倍主勝值得一試。（開賽時間：周六凌晨1:00）
禾夫斯堡踢得1場熱身賽

由於荷甲比德甲早開咧，所以阿積士晨早開操，至今踢咗3場賽事，包括鬥彭拿典奈高斯等歐戰常客，令球隊狀態提升唔少。雖然射手史基賀臣執意離隊，好在阿積士勁快買斷利華古遜借將、上季球隊首席射手米利克，又從阿爾克馬爾撬走射術出色嘅中場尼曼查古迪積，加埋引入經驗豐富嘅守將希汀加，大大提升球隊士氣同實力。最近更傳出有意租借阿仙奴前鋒耶耶辛洛高添，一眾箭頭今仗仲唔加多兩錢肉緊數胡咩。

另邊廂，禾夫斯堡暫時踢得1場熱身賽，賽和波蘭球隊列治亞1:1，班波明顯未上力。最影響軍心嘅係主力奇雲迪布尼有意過檔曼城，需知呢位中場發電機掌控球隊進攻命脈，一日唔拆掂單轉會，一眾「狼兵」都好難專心踢波喎。