羅馬趁亂爆艦

猪拉多纳

今日下午國際冠軍盃澳洲站在墨爾本拉開戰幔，上屆盟主西甲班霸皇家馬德里隆重登場硬撼意甲羅馬，「銀河艦隊」兩大王牌C朗同加里夫巴利一向有心病，但新帥賓尼迪斯竟然火上加油，想以「大聖爺」為進攻核心改打中鋒，擺明唔畀面C朗，「肥賓」冇嘢搵嘢嚟搞自亂陣腳，隨時畀羅馬偷到雞，仲有得受讓必捧讓球客勝。

（有線61、64、201及203台周六下午5時直播）
卡士有限 帶唔掂巨型班

今屆國冠盃皇馬分別會於澳洲同中國踢4場波，非常頻撲，佢哋今日就展開第一擊，先喺澳洲墨爾本出戰意甲勁旅羅馬。「銀河艦隊」今夏邀請賓尼迪斯取代安察洛堤接掌兵符，呢個決定惹人非議，一來安察洛堤前屆先帶隊勇奪歐聯，上季冇貨交即炒太不近人情，二來賓尼迪斯卡士有限，連拿玻里都帶唔掂，點樣管得掂球星如雲嘅「銀河艦隊」呀？

皇馬兩大王牌C朗同加里夫巴利上季屢傳不和，試過後者入波C朗竟黑面，而「大聖爺」喺C朗陰影下亦坦言踢得唔開心。不過賓尼迪斯一於少理，仲想硬推巴利仔為進攻核心，《馬卡報》大爆「肥賓」安排佢打中鋒，而《阿斯報》更刊登兩人有講有笑嘅相做頭條，關係匪淺。如果「大聖爺」出任中鋒，並畀佢有足夠射門嘅自由度，即係直接分薄咗C朗嘅得分機會，而且呢位葡萄牙萬人迷做慣大佬，點會甘心屈居人下，仲要係同佢有心病嘅「大聖爺」，C朗唔發癲就奇。雖然暫未傳出兩人吵大鑊消息，但「肥賓」咁做等同埋下計時炸彈冇分別，遲早出事。
托迪領軍 頂得住皇馬

羅馬今季變動唔大，傳聞會走人嘅謝雲奴同艾殊利高爾仍在大軍名單，當然唔少得38歲嘅「老王子」托迪，而且啱啱同兩大中場悍將施度基達及尼恩高蘭續約，穩定軍心。如今皇馬內部不和，賣走門將兼隊長卡斯拿斯，沙治奧拉莫斯有離心，又未斟掂曼聯神龍迪基亞過檔，占士洛迪古斯又因踢完美洲盃冇耐未歸隊，呢類季前「拍跳」仲要讓波實在信唔過，斯維寧捧羅馬讓球客勝。