賓菲加早開操破門有術

猪拉多纳

除咗澳洲站皇馬對羅馬，國冠盃北美站明早亦有戰事，葡超賓菲加將於加拿大多倫多鬥法甲豪門巴黎聖日耳門。賓菲加今季雖有新教練上任，不過主力球員變動不大，相反PSG陣中唔少國腳踢完美洲國家盃仲未歸隊，唔齊腳讓唔起對手，捧讓球主勝。

（有線61及201台周日早上8時35分直播）

賓菲加今季最大變動係主帥佐治捷西斯轉投士砵亭，由前甘馬雷斯教練雷爾域多利亞接手。雷爾域多利亞喺04至06年曾教過賓菲加青年軍，代表作係02至03年球季帶領甘馬雷斯喺葡聯盃決賽擊敗賓菲加捧盃。為咗盡快融入新球會及加深對球員了解，佢選擇提早喺7月初開操，經過多課操練，相信球隊已谷起一定狀態。
PSG主力未歸隊

賓菲加今季離隊球員主要有中場安祖艾美達、彭利拿和蘇利馬尼，其餘主力包括前鋒莊拿斯干卡維斯、洛迪高尼馬、奧斯華度加坦、費積沙及隊長安達臣雷沙奧今次均有隨隊。相反PSG陣容嚴重不整，卡雲尼、拿維斯、柏斯托尼、堤亞高施華、大衞雷斯等因出戰美洲國家盃未歸隊，加上中場卡比耶離隊，就算有伊巴謙莫域、莫達、馬高華拉堤壓陣，講整體合作及實力頂盡只係同賓菲加打成平手，PSG要讓波唔抵玩。