拜仁華倫吼半和

猪拉多纳

未操弗長征 幾難唔慢熱

今晚有場重量級國際熱身賽，德甲班霸拜仁慕尼黑同西甲四哥華倫西亞，將於北京國家體育場(鳥巢)上演奧迪足球峰會北京站賽事，兩軍目前都係季前備戰嘅最初階段，狀態未足人腳未齊，加上經過長途跋涉抵京要時間適應，預期要一段時間至可以進入狀態，推介2.45倍半場和。

（有線61及64台周六晚7時35分直播）

拜仁雖然喺本月一日開操，但多名國家隊同U21代表都獲准押後一星期歸隊，準備時間同華倫西亞差不多，佢哋牌面雖然較高，但今次訪華並唔齊人，主力列貝利、洛賓加上丹迪、畢斯杜巴同卻治賀夫都因傷未有隨軍，舒韋恩史迪加同比沙路經已離隊，球隊喺較早前嘅德國電訊盃表現令人失望，先後輸畀奧格斯堡同慕遜加柏，係球會參加呢項盃賽歷史上首次包尾，一條矮仔防線遇空襲即輸係最大隱憂，雖然今仗一眾國腳包括紐亞、謝路美保定、馬里奧葛斯同利雲度夫斯基等趕及上陣，但佢哋之前一場熱身賽都未踢過，相信要啲時間熱吓身先。

華倫西亞人腳名氣唔及拜仁，但球隊喺奧地利嘅三場熱身賽表現較穩定，兩勝一和一球不失，今次雖然有中堅奧達文迪扭計轉會未有隨軍，但陣容總算較為完整，球隊今夏大手筆，買斷咗尼格度同洛迪高摩連奴等貴價借將，不過佢哋一樣經過長途旅程，今晚踢得慢熱係意料中事。
湯馬士梅拿大受歡迎

兩軍尋日中午前後腳抵京，亦前後腳到鳥巢操練，但球迷待遇一天一地，拜仁喺機場已經有逾千人恭候，去到操練更搞到鳥巢變咗拜仁主場，當中以湯馬士梅拿最受歡迎；至於華倫球星唔多，全程冇乜人理，陣中最多人識嘅，相信係上月底啱啱上任嘅助教，前曼聯「七小福」成員之一嘅菲臘尼維利。