撐林伯紐約城遲來處子騷

猪拉多纳

等足1年，林柏特終於可以為紐約城上陣！呢位英格蘭名將月初歸隊操練後，上周唔好彩受輕傷，押後到今輪上演美職處子作，作客新英倫革命。「林伯」休息咗兩個月，狀態或者未足，但佢嘅級數喺美職仍屬超班，加上隊友韋拿大勇，近4仗共入6球，足以摧毀6連敗嘅新英倫革命。更何況紐約城受讓，1.8倍讓球客勝穩陣。(TVB 301周日早上7時30分直播)

37歲嘅林柏特原定上輪對FC多倫多登場，但因拉傷小腿，而未能披甲。幸好只係輕傷，佢早前透露準備今場上陣，令人期待。以「林伯」嘅級數，即使狀態成疑，但仍壓到場，牽制對手，令另一位球星韋拿有更多活動空間。呢位西班牙射手狀態弗到漏，上仗又梅開二度，近4仗入咗6球，依家有埋林柏特助攻，相信入波數字會進一步增加。
串FC多倫多科羅拉多急流

至於新英倫革命表現每況愈下，已經連輸6場，上仗以1比4慘敗喺紐約紅牛腳下，信心近乎崩潰。加上守將荷西干卡維斯停賽，令防線雪上加霜，更加抵擋唔住韋拿同林柏特來犯，讓波必捧對家。

另一場美職FC多倫多主場對費城聯，亦值得留意，FC多倫多嘅意大利國腳基奧雲高腳風非常順，上仗大演帽子戲法，今季已有11球進帳，可輕取費城聯。（TVB 301周日凌晨4時直播）至於西雅圖海灣者主場對科羅拉多急流，海灣者球星丹普西仍然為美國踢緊美洲金盃，球隊失去進攻重心，近5戰4敗，讓唔起對手。

（TVB 302周日早上10時直播）