金盃8強見真章 美國變陣勢炒古巴

猪拉多纳

美洲金盃8強明晨展開，東道主兼冠軍熱門美國率先上陣，迎戰以得失球「-7」出線嘅古巴！美國雖然喺分組賽表現未如理想，但實力始終遠超古巴，領隊奇連士文更重新調整陣容，連已退出國家隊嘅老將比士利都復出救亡，嚟到淘汰賽班球員應該上力，讓2球1.58倍「讓球主勝」值捧。

（開賽時間：周日清晨5:00）
兩件兵叛逃 古巴只得15球員

有主場之利嘅美國分組賽雖取得2勝1和，但整體演出其實麻麻，2場勝仗都係小勝，擺明就見對手弱Hea踢。不過嚟到淘汰賽，美國應該會加多兩錢肉緊，奇連士文亦盡用8強球隊更換最多6名球員嘅賽例，將狀態低沉嘅艾迪杜里等3人踢走，召入有121頂喼帽嘅比士利、銀河前鋒阿倫哥頓同中場祖哥朗拿，決心重整旗鼓。

以17個本土球員出戰嘅古巴，開賽後仲有兩件走咗佬，實力同美國差九條街，佢哋分組賽因為贏咗另一魚腩危地馬拉，符碌以第3名出線，但古巴另外2場分組賽分別吞墨西哥6蛋同吞千里達2蛋，證實佢哋根本冇能力同較高級數嘅球隊抗衡，今場梗冇運行啦。