阿仙奴愛華頓頹細爭霸

猪拉多纳

玩轉獅城備戰鬥hea

英超亞洲挑戰盃今晚上演決賽，愛華頓、阿仙奴會師新加坡國家體育場。「兵工廠」同「拖肥糖」成功躋身決賽後，兩隊齊齊忙裏偷閒，分別遊覽新加坡景點同出席宣傳活動，備戰態度唔算認真，況且呢項賽事過往喺決賽少有大手交易場面，一於揀2.05倍入球細啦。

（now621台周六晚8:30直播）
阿仙奴實力未見真章

「兵工廠」首戰清脆淨贏四粒，前鋒艾卡邦大演帽子戲法，教頭雲格賽後讚到呢件19歲小將天上有、地下無，話佢喺禁區擁有「殺手本能」。老實講，阿仙奴實際表現係咪咁sharp醒呢，真係見仁見智，筆者就覺得好大原因係對手新加坡明星隊實力太渣所致，今場面對同屬英超嘅愛華頓，即使首戰冇份踢嘅奧斯爾、施治等球星悉數上陣，都未必可以再也文也武。
愛華頓射手狀態唔弗

另邊廂嘅愛華頓狀態亦唔算好fit，上仗對住史篤城，班波踢落明顯仲未上力，盧卡古、賴史密夫等射手埋門亦欠缺準繩，最終只靠射贏12碼驚險晉級，上場波到依家只不過相隔短短幾日時間，相信佢哋嘅表現好難有大幅度改善。

仲有呀，兩隊賽前備戰嘅態度頗為輕鬆，阿仙奴班球星去完濱海灣金沙酒店頂樓睇風景後，再到地標魚尾獅，而愛華頓班戰將就出席足球遊戲宣傳活動，同粉絲打機打餐飽後，再夜遊新加坡著名景點，要佢哋喺今場同你搏命做入球騷？似乎難啲喎！

再睇埋往績就知，喺過去6屆決賽埋單有5屆開「細」唔在講，其中2屆更加喺法定時間內顆粒無收，更何況佢哋近9次碰頭亦有6次開出入球細，今場可以話係「細」不可擋呀！