政策打壓辛尼特獻細

猪拉多纳

新一季俄超前幾日已經開咧，上季盟主辛尼特今晚首次登場，主場迎戰莫斯科戴拿模。日前俄超頒布削減外援出場名額，對辛尼特發揮有一定影響，上周俄超盃贏得勁辛苦有辦你睇，面對一心死守嘅戴拿模唔易食，捧入球細好過。（周日晚6時30分開賽）

俄超以往規例，原本每隊每場可派7名外援上陣，甚至一度想增加到10個，不過當地體育局認為咁做不利國家隊長遠發展，因此從今季開始實施新政策，新球季每仗同時間只可派6名外援上陣，比之前削減咗1個名額。辛尼特主帥保亞斯嬲到紮紮跳，誇口話如果冇咗侯克、韋素、查維加西亞呢班辛軍星級外援，俄超仲剩番乜嘢？事實上，辛尼特上周俄超盃幾經辛苦逼和莫斯科火車頭，最終要靠互射12碼先險勝捧盃，表現麻麻明顯未上力。
古蘭爾離隊 戴拿模焗守

雖然辛尼特今夏不斷買本土球員應對新政策，但尤素普夫、迪斯尤巴及米希爾基沙哥夫嘅質素，點可以同侯克、韋素等相提並論，用少個外援絕對有影響。莫斯科戴拿模陣中仍有迪素迪沙基、基斯杜化森巴、高哥連等猛將，可惜上季首席射手古蘭爾約滿離隊，少咗呢位前德國國腳壓陣，難怪之前4場熱身賽有3場開細，作客辛尼特惟有穩陣行先，今仗唔慌多波入，細盤有1.9倍咪嫌少。