羅沙里奧 沙士菲駁火做大騷

猪拉多纳

唔少阿根廷球星今季鳥倦知還，重返家鄉効力，除咗曾經喺歐洲豪門打滾嘅箭頭泰維斯同沙維奧拿外，仲有前維拉利爾射手馬高魯賓，佢加盟羅沙里奧中央後，表現隨即翻生，暫時攻入11球成為射手榜一哥，既然有呢位當Fit前鋒壓陣，聽朝中央主場迎戰近期火力爆發嘅沙士菲，仲唔係揀2.3倍入球大嘅好時機！（開賽時間：周一清晨5:15）
馬高魯賓回歸大爆發

羅沙里奧中央上季明明喺榜下游掙扎，點知今季引入馬高魯賓後即大爆發，一直穩守聯賽榜上游。呢位28歲前鋒曾經踢過維拉利爾、基輔戴拿模等歐洲名牌球隊，經驗豐富，今季重返阿甲後16場聯賽攻入11球，更協助隊波保持今季主場例有士哥紀錄。今次中央再喺自己地頭出擊，睇怕以馬高魯賓為首嘅鋒線又係時候開餐。

另邊廂嘅沙士菲，近期鋒線同樣着晒火，近4場合共轟入8球，佢哋上仗主場鬥堤格雷喺比賽末段連追兩粒，逼和對手2:2執番1分，足見呢班波鬥志十足。今次仲唔趁住中央首席門將卡雲達停賽，盡情開火搶分咩！