曼城冇態入多粒都難

猪拉多纳

英超水魚之霸曼城今日會喺國際冠軍盃首戰於墨爾本面對意甲勁旅羅馬，高價新兵史達寧有望上演處子戰，無論你係「撐寧派」定「反寧派」，今場都唔可以錯過呀！羅馬喺首戰同皇家馬德里90分鐘踢成0比0，表現唔失禮，今場面對狀態未起嘅「藍月亮」，睇怕都唔慌多波入，細盤值得捧場。（有線61、64、201及203台周二下午6時直播）

曼城最近接連簽入兩名反骨仔史達寧同戴爾夫，佢兩個依家人見人憎，率先抵達澳洲嘅史達寧去咗看台睇新東家上場友賽墨爾本城，當現場電視大螢幕影住佢嗰陣，全場即刻噓爆，未落場已經受到「熱情招呼」，「反骨寧」今場對羅馬睇嚟都有排受，球迷唔好預期佢會交出好表現嘞！至於戴爾夫就未趕及上陣，要到再下一場對皇馬先有望出戰。

其實「藍月亮」上場對墨爾本城都有派出耶耶托尼、拿斯尼、捷西斯拿華斯等球星應戰，可惜都要踢到86分鐘先打破僵局，贏1比0完場，始終球隊兩大進攻核心大衞施華同阿古路都不在陣中，想入波係難好多。大衞施華今場雖然有望上陣，不過休息咗咁耐，都要畀時間佢慢慢操起狀態！
羅馬防線頂得兩嘴

羅馬喺上季歐聯分組賽兩戰曼城，兩場都開細，不過最後一場就係不敵「藍月亮」0比2，輸波之餘兼出埋局，呢啖氣又點會吞得落？羅馬上場搞到皇馬入唔到波，今場要守住曼城更加唔難，所以捧入球細之餘，玩埋讓球主勝都得呀！