拜仁國米大騷娛賓

猪拉多纳

今晚又有重量級熱身賽直播，德甲班霸拜仁慕尼黑同意甲國際米蘭將於可容八萬人嘅上海體育場較量，進行奧迪夏季中國足球賽第二站。拜仁平均質素稍秤先，加上早國米一步嚟到中國，適應方面佔先機，考慮到兩軍季前熱身賽踢法開放，今場大盤及讓球主勝可兼投。（有線61、64、201及203台周二晚8時直播）

拜仁啱啱喺北京以4比1大炒華倫西亞，過程清風送爽，一眾入球功臣包括湯馬士梅拿，堤亞高艾簡達拿同羅拔利雲度夫斯基狀態甚弗，當中梅拿話估唔到去到北京好似喺主場比賽，入波後聽到球迷用德文唱出拜仁打氣歌「南方之星」，感動到想喊，令全隊喺場上更起勁。
國米前線有睇頭

拜仁今日轉戰上海，飛行里程比國米短得多，適應同體力都佔上風，球隊抵達上海後即恢復訓練，上仗只喺場邊觀戰嘅紐亞同馬里奧葛斯都完成操練，估計教練哥迪奧拿今場會派佢哋落場，不過守將查維馬天尼斯及中堅謝路美保定有輕傷，防線人腳未齊，今仗贏面雖高但未必可保持不失。

國米啱啱搭長途機抵達上海，尋日進行雨中適應性操練，隊長蘭奴捷亞承認球隊有疲態，教練文仙尼喜歡踢性感足球，季前熱身賽面對德丙嘅史特加踢球者險贏4比3，跟住對初升意甲嘅卡比亦開入球騷贏4比2，防線表現相當曳，今次守將尼曼查維迪同杜杜都因傷冇隨軍，前鋒佐治普斯卡斯同新兵比亞比安尼亦冇嚟，人腳唔齊。好在主力攻擊手莫路伊卡迪、柏拉斯奧同古亞連都在陣，高價新援干度比亞熱身賽亦有貨交，前線有啲睇頭。加上國米去到上海有好多熱情球迷支持，唔似華倫咁冇人理，預期會同拜仁搶攻氹捧場fans。