巴塞銀河「大」打出手

猪拉多纳

恩尼斯達坐正後第1戰

論實力，巴塞就算有王牌美斯、前鋒尼馬、中堅馬斯真蘭奴、右閘丹尼爾及門將哥迪奧巴禾未歸隊，依然甩開銀河幾條街，話晒佢哋上季成為「3冠王」，新簽番嚟嘅中場阿達杜倫又夠料打正選，尤其是呢場係恩尼斯達成為巴塞新隊長後首場比賽，怕且佢哋都唔會揸流攤，相反會喺美國運動聖地玫瑰碗球場打響頭炮。

或者大家都記得，上季巴塞喺安歷基執教鞭後，頭幾場季前熱身賽表現係就係好曳，但其實佢哋最後兩場季前賽，先後以6:0炒起赫爾辛基同利昂，呢場美斯同尼馬唔在陣，蘇亞雷斯難得喺前線做大佬，相信會踢得更加落力！
防線超殘 銀河以攻為守

對家銀河就閉翳咯，門將彭尼度被千里達國家隊徵召，後衞奧馬干沙利斯入選美國國家隊，條防線天殘地缺，點頂得住一心想攞威嘅「蘇神」先？係，銀河新簽入嘅前鋒杜斯山度士幫墨西哥踢緊美洲金盃，仲未可以落場，但謝拉特踢完2場熱身賽，日前喺美職首度亮相，就交出1個入球、2次助攻帶挈銀河以5:2反勝聖荷西地震，絕對唔可以睇小。最重要係蘇亞雷斯轉會後，曾經間接踩「紅軍」同謝拉特，呢次「老友」再遇，相信大家都唔想衰，銀河有謝拉特加羅比堅尼，就算贏唔到都夠晒力破蛋，唔會咁易扯白旗。