宣傳作客新衫 「迪哥」擔正

猪拉多纳

換咗新胸口贊助商嘅車路士近日公布新作客波衫，搵嚟迪亞高哥斯達、夏薩特、泰拔高圖爾斯等主將擔正做Model。呢件白色波衫走簡約風，兩邊衣袖就分別有一條紅色同藍色邊。不過大家冇咁快可以睇到一班「車手」着呢件波衫落場比賽，要等到月尾鬥巴塞隆拿一戰先會登場，各位「車迷」等吓添啦！
菲臘路爾斯重返馬體會

喺呢輯新波衫沙龍入面，「迪哥」企正中間，連「夏神」夏薩特都要「靠邊站」，證明「迪哥」雖然易傷，但都係成隊波嘅靈魂。不過，莫連奴日前強調，球隊需要後備前鋒雷米留隊，認為佢係陣中重要一員，仲大讚佢上季幫車仔入咗好多救命波。至於另一後備菲臘路爾斯就冇得留低，呢位巴西左閘上季以1,600萬鎊（約1.93億港元）由馬德里體育會加盟車仔，結果只係出場15次，英國傳媒指佢將會重返馬體會。