砂岩殘陣飛腳嗒糖

猪拉多纳

今日日職獨腳戲大阪飛腳主場迎戰鳥棲砂岩。大阪飛腳連續兩場聯賽都喺領先下失分，今場會打醒十二分精神。鳥棲砂岩主力前鋒豐田陽平有傷在身料缺陣，對客軍打擊極大，主隊贏波機會濃，讓半一捧上盤。（周三晚6時開賽、馬會網上文字直播）

大阪飛腳係首階段聯賽失球最少球隊，不過踏入次階段防線失晒魂，近兩場對名古屋鯨魚及橫濱水手，同樣一度領先2比0都攞唔晒三分，吸取教訓後相信唔敢再大意。撇除後防問題，飛腳前線絕對交到功課，前鋒安達臣柏德列連續三場有士哥，宇佐美貴史亦繼續保持穩定入球率，對住次階段三場聯賽都有失波嘅砂岩要入波唔難。
砂岩箭頭門神缺陣

砂岩頭兩輪分別擊敗柏雷素爾及打和川崎前鋒，表現唔錯，可惜喺呢兩場都有入波嘅前鋒豐田陽平上場對新潟天鵝傷出，最終球隊反撲乏力輸0比1。據報豐田陽平今仗好大機會繼續缺陣，連續兩場因傷倦勤嘅正選門將林彰洋亦未能趕及復出，攻守方面都有隱憂。飛腳為免重蹈近兩場失分覆轍，領先都唔會放軟手腳，讓半一照捧上盤。