車仔踩油撞散紅牛

猪拉多纳

全新 「輪胎能」登場

國際冠軍盃輪到「寸王」出場，紐約紅牛聽朝喺主場對車路士，唔似爆得出。首先紅牛尋日至踢完美聯盃8強賽事，肯定要搵副選球員撐場，其次呢場係車仔換波衫贊助商後首場比賽，正所謂「輪胎能」，頭炮唔開1.93倍「讓球客勝」點得呀？（有線61及201周四早上8:05直播）
紅牛戰罷美聯盃焗派副選

紅牛今日凌晨喺美聯盃8強出戰費城聯，截稿前仲未知咩賽果，但無論如何，紅牛本身後備力量唔強，又有後衞基斯杜華爾同蘇巴養傷，加上後衞萊爾米拿為哥斯達黎加出戰美洲金盃後，未知踢得未，淨係靠踢開英格蘭低組別球隊嘅射手巴利胡禮菲臘斯，好難威脅到車仔大門。

另一方面，車仔休季期間放走射手杜奧巴同門將施治，但佢哋已經唔係主力，離隊冇乜影響。雖然幾個新加盟球員質素唔算特別高，最有戰鬥力嘅射手法卡奧又因為踢美洲國家盃延遲歸隊，但佢哋總算強陣出征，何況車仔後備力量出名強勁，無論點排陣，都有條件玩殘紅牛班後衞。

藍戰士
4.8億新贊助上身

仲有呀，車仔結束同韓國贊助商嘅合作後，今季開始埋日本新贊助商廣告碼頭，對方嘅中國版廣告「輪胎能」掀起過網上熱潮，古天樂嘅港式普通話被網民捧為神級演繹。聽講車仔今次每年有4,000萬鎊（約4.8億港元）贊助費落袋，簽約當日領隊莫連奴都有畀面出席，呢場梗係要攞頭威啦！