紅軍東征繼續W

猪拉多纳

「馬明隊」內亂唔齊腳

利物浦今夏東征演出對辦，泰國、澳洲兩站三賽全部贏晒，新援占士米拿、丹尼艾格斯踢得醒神唔在講，新隊長佐敦軒達臣亦漸見領袖風範。今日東征之旅尾站嚟到吉隆坡，對手馬來西亞明星隊爆發「內亂」，慘遭馬超聯隊伍詐型拒絕放人，戰鬥力大跌，今仗聽做炮灰都似，讓2球照撐「紅軍」1.72倍「讓球客勝」。 （有線61、64、201及203周五晚8:45直播）
新兵占士米拿省2粒

新隊長軒達臣助攻醒

「紅軍」今夏東征之旅先後以4:0擊敗泰國明星隊、2:1反勝布里斯班獅吼同2:0淨勝阿德萊德聯，新隊長佐敦軒達臣交出全隊最多嘅3個助攻，鋪橋搭路功夫到家之餘，拉爾拉拿同占士米拿亦各省兩粒，新援舊將開始培養出默契，今日嚟到東征最後一站，梗係要贏得好好睇睇答謝球迷啦！

馬來西亞明星隊諸事不順，除咗煞食雙箭頭艾舒費同達馬尼查奧爾，分別因受傷同缺態被剔出大軍名單，唔少馬超聯隊伍都唔滿意喺聯賽搏殺期間踢今場表演賽，其中雪蘭峩拒絕放前鋒艾斯美、阿密特巴克里同後衞干夫韋迪外，彭亨亦企硬唔畀箭頭尼華卡美報到，嚴重削弱「馬明隊」戰鬥力。
馬超球隊不滿

拒派人踢太公波

再講吖，「馬明隊」過往鬥歐洲球會例牌冇好下場，遠嘅唔講，淨係由2001年淨吞曼聯6蛋開始，其後遇着車路士、阿仙奴、曼城同巴塞隆拿等球會全部輸晒，13戰合共失咗39球，4年前更被「紅軍」6度攻破大門，佢哋今場仲要殘陣應戰，想唔輸鑊甘都難！