阿仙奴炒里立威

猪拉多纳

自從阿仙奴破咗9年冠軍荒，連續兩季贏得足總盃後，就再冇人笑每年夏天嘅酋長盃係「兵工廠」唯一一個獎盃。咁又係呀，依家真係冇人敢再睇小「兵工廠」，呢隊波陣容完整，今夏仲要簽入門神施治，實力真係拍得住上季冠軍車路士。已經有3屆冇攞過酋長盃冠軍嘅阿仙奴，今屆矢志要喺自己地頭重奪冠軍，首戰對里昂一於博讓球主勝！（TVB 301周六晚11時20分直播）

車路士、曼城、曼聯等英超勁敵均喺今夏轉會窗不斷增兵，相反阿仙奴只係簽入捷克鋼門施治一個。係因為領隊雲格又嚟「鐸叔」上身？梗係唔係啦，阿仙奴高層日前先話球會戶口有成2億鎊（約24億港元）現金可以畀雲格買人。其實睇番「兵工廠」依家嘅陣容，中後場都夠晒人，有咗施治後防更見穩陣，而奧斯爾、阿歷斯山齊士、辛迪卡索拉、艾朗藍斯等中場個個都傳得又入得，加上對比起之前幾季，阿仙奴上季嘅傷病率下降咗20%，難怪英國有傳媒話佢哋來季有力成為英超冠軍。

睇番「兵工廠」上兩場喺英超挑戰盃嘅表現，先係以4比0大炒新加坡明星隊，去到決賽對住愛華頓，以為會難踢好多，結果都清風送爽贏對手3比1，奧斯爾同辛迪卡索迪更各交出1入球1助攻表現，狀態不俗，今晚酋長盃對里昂有望繼續大勝。
里昂無復當年勇

里昂近幾年實力下滑咗唔少，上季有啲機會爭法甲冠軍，但最尾都無以為繼，今夏踢咗3場熱身賽，只係贏得1場，對住錫永同燕豪芬都輸波而回，狀態唔係好掂。隊波冇成績，更難留得住王牌射手拿卡錫迪，盛傳眾多歐洲豪門都睇中呢位24歲法國前鋒，拿卡錫迪仲邊有心幫里昂踢波吖！今場都係捧阿仙奴喇！