禾堡前線增兵發到維

猪拉多纳

另一場酋長盃賽事就由上季德甲亞軍禾夫斯堡對戰「黃色潛艇」維拉利爾，雖則話熱身賽冇乜意義，但都有其參考價值，「黃色潛艇」近兩場熱身賽對住實力較次嘅西乙同澳職球隊都贏唔到，就知隊波有幾唔掂，今場一於捧禾夫斯堡順利贏波！（TVB 301周六晚9時直播）

禾夫斯堡上季表現出色，雖然最尾以10分差距不敵拜仁慕尼黑屈居聯賽亞軍，但冇人再質疑呢隊波實力唔勁。「狼堡」中場有奇雲迪布尼孭飛，前面就有「禁區之狐」巴斯杜斯狂數胡，今夏仲以1,200萬歐元（約1億港元）從慕遜加柏簽入麥斯古斯。

呢位27歲前鋒上季喺慕遜加柏射入11球，僅次於神射手拉菲爾基達奴嘅12球，佢嘅來投將有望進一步加強「狼堡」攻力，到時名大於實嘅賓特拿真係連後備都冇得做呀！
維拉利爾近況勁曳

相反維拉利爾失去上季神射手韋圖，簽入嘅新兵又仲未融入球隊，搞到球隊喺熱身賽冇料到，爆冷同西乙嘅塔拉戈納打和1比1都算，最爆都係畀澳職球隊布里斯班獅吼大炒0比3，真係羞家到暈，今場對住實力更強嘅「狼堡」，都係投降罷啦！