三箭鋒利打橫行

猪拉多纳

日職今日有兩場直播波，分別係川崎前鋒主場對清水心跳，同埋廣島三箭主場對橫濱水手。其中三箭踏入次階段聯賽後3戰全勝狀態甚弗，相反水手上仗能夠逼和飛腳純粹夠運，球隊防線問題依然未有改善下，今仗面對火力甚強嘅三箭相信都係冇運行，阿謙睇好三箭主場可以高奏凱歌，主Ｗ有1.87倍值捧。（有線64及203台周六晚6時直播）

三箭自次階段聯賽重開後3戰全勝，表現Sharp醒，球隊喺呢3場波入咗12球只失4球，可見攻守兼備，上仗作客火併連續19場聯賽不敗嘅浦和紅鑽，都能夠反勝2比1，證明呢班波近期遇神殺神。三箭今仗雖有後衞高橋壯也同中場柴崎晃誠因傷缺陣，而射手佐藤壽人亦連續兩場冇波入，但佢曾經喺首階段聯賽攻破水手嘅大門，加上正爭取打破日職歷來最多入波嘅紀錄，相信「佐藤桑」唔會錯過喺主場爭取入波機會。

橫濱水手上仗作客憑隊長中村俊輔補時5分鐘射入靚絕罰球，先能夠以2比2逼和飛腳，表現一般。水手次階段聯賽踢咗3場只得2和1負，未開齋之餘每場都有失波，防線明顯出問題，今仗雖有後衞小林祐三刑滿復出，但作客相信難以阻擋三箭取得入球，1.87倍主勝咪走雞。
鄭大世倒戈力擋川崎

另一場直播川崎前鋒主場對清水心跳，前鋒在射手雲拿天奴離隊後上仗即不敵柏雷素爾，但現時仍未搵到適合替補人選，只能靠大久保嘉人同杉本健勇攻堅。心跳上仗靠彼得烏達卡梅開二度踢和名古屋鯨魚，球隊新簽入嘅北韓前鋒鄭大世今仗大有機會登場，此子當年曾効力前鋒，倒戈面對舊會相信會更落力，有望幫心跳搶分，捧讓球客勝。（有線61及201台周六晚6時直播）