阿仙奴唔Ｗ都難

猪拉多纳

萬眾期待，「Lord賓」回歸！酋長盃重頭戲，阿仙奴主場迎戰禾夫斯堡，一眾「廠迷」終於有機會見番「神」──「Lord賓」賓特拿。究竟「Lord賓」又會創造啲咩「神迹」，真係令人好緊張、好期待呀！各位今晚仲唔買定花生等睇好戲？「兵工廠」眾將為咗唔畀「Lord賓」搶風頭，今場肯定會加多兩錢肉緊，證明「活得比神好」，主勝咪錯過！

（TVB 301周日晚11時20分直播）
施治把關靠得住

尋晚先踢完酋長盃，今晚接住又開打，真係好考球隊嘅陣容深度，主人家阿仙奴嘅優勢梗係最大，佢哋雖然冇咗受傷嘅韋碧克，仲有因為參戰美洲國家盃未歸隊嘅阿歷斯山齊士（A山）同門將奧斯賓拿，同埋施捷斯尼亦接近借去羅馬，今場唔會出戰，不過「兵工廠」仍有足夠兵源應付兩場比賽，「銀河唯一」基奧特同球隊續咗約，誓要喺酋長盃顯身價，而禾確特、阿歷士張伯倫亦可頂替A山嘅位置，至於後面冇咗奧斯賓拿、施捷斯尼兩位門將亦唔使擔心，「兵工廠」仲有最堅嘅施治守住大門嘛！

計埋青年軍時期，賓特拿一共効力阿仙奴十年，真係要慨嘆一句「人生有幾多個十年」，賓特拿喺呢十年屢創「神迹」，試過擋住隊友射門，幫對手「護空門」，從此「Lord賓」就多咗個「中堅賓」稱號，佢亦多次上演「世紀Miss」，喺球場上撞板多過食飯，相信「廠迷」都刻骨銘心！今次倒戈前夕，「Lord賓」喺網上發表深情感言：「好期待星期日嘅比賽！阿仙奴對我嚟講一直是重要球會，我已經等唔切想見番一班隊友、球迷同球會所有人，阿仙奴永遠係我生命中一部分。」唔知「廠迷」睇完有冇眼濕濕呢？
禾堡隨時出副選

由於兩日踢兩場波，禾夫斯堡教頭赫基今場好有可能作出輪換，派副選落場，「Lord賓」落場倒戈阿仙奴呢個最期待嘅畫面有望出現，到時仲唔益咗「兵工廠」？阿仙奴有主場之利，後備力量亦勝過對手，加上有賓特拿「幫手」，真係有齊天時地利人和，今場只要發揮水準，主勝冇走雞！