阿仙奴搏命「大」起狼堡

猪拉多纳

雲格入主20周年唔想衰

酋長盃重頭戲今晚上演，東道主阿仙奴對禾夫斯堡，肯定攻到對手有氣無碇抖，因為「兵工廠」已經連續3年失落酋長盃冠軍，唔可以再衰，而且領隊雲格即將迎接「入廠」20周年，新季首個錦標當然唔想失，睇怕會落柯打同禾夫斯堡鬥攻，玩入球大最好路。

（TVB301台周日晚11:20直播）

阿仙奴領隊雲格近年高舉進攻足球旗幟，但偏偏連續3年失落提倡進攻嘅酋長盃，搞到「廠迷」相當冇癮。雖然截稿前未知「兵工廠」首戰對里昂踢成點，但上年佢哋以5:1炒起賓菲加，以為佢哋好巴閉之後，跟手又以0:1不敵摩納哥，無厘頭失落酋長盃冠軍，畀粉絲笑到面黃，吸取教訓後，無論首戰踢成點，相信班「廠仔」都唔敢再玩嘢，全力爭取入球。

咁講真，現時阿仙奴真係相當齊章，除咗翼鋒阿歷斯山齊士捧完美洲國家盃仲未歸隊，有傷嘅前鋒韋碧克、隊長阿迪達同中場路斯基，都唔算係隊中爭勝嘅關鍵主力，影響唔算太大，何況到今年9月，就係雲格執教「兵工廠」20周年嘅大日子，近年佢成日畀人寸贏唔到錦標，難得家陣咁多猛將畀佢用，相信連酋長盃都唔會放過。
禾夫斯堡火力有增無減

對家禾夫斯堡日前喺熱身賽以4:2擊敗蘇黎世，入得又失得，或者最新簽入嘅蘇黎世中場艾拉耶大家都唔識，但前慕遜加柏箭頭麥斯古斯就幾猛料，加上射手巴斯杜斯、舒賀爾尼同中場奇雲迪布尼留低，火力比上季更恐怖，唯一可惜係中國球員張稀哲返咗中超冇機會落場，少咗個Talking Point，不過唔緊要，一於照食花生等睇「大」戲喇！