皇馬用番BBC得米

猪拉多纳

中國站第2彈廣州爆發

國冠盃「中國站」第二戰，國際米蘭同皇家馬德里喺廣州火併！「銀河艦隊」新帥賓尼迪斯向現實低頭，上仗澳洲站排出巴利、賓施馬及C朗的「BBC」組合，畀番C朗踢最擅長左翼，呢位葡國巨星亦投桃報李，以入波回報「肥賓」，大炒曼城4比1，將帥關係亦有改善。皇馬可以團結專心備戰，更加銳不可當，以國米訪華兩戰都捧蛋嘅頹勢，恐怕無力招架，直取皇馬讓球客勝。

（有線61、64、201及203台周一晚8時直播）

賓尼迪斯執掌皇馬帥印後，一直想安排C朗踢正前鋒，更因此傳出兩人鬧不和，結果對羅馬一役打和0比0，仲射輸埋12碼，反映賓帥變陣計劃失敗。「肥賓」始終剛上任，唔敢再玩嘢，上仗鬥曼城，立即用番賓施馬擔任箭頭，配合C朗及巴利兩翼側擊，效果立竿見影，打通進攻經脈，意味C朗喺今次「位置鬥爭」中勝出，但佢亦需要繼續交足功課，證明自己正確，預料今仗會繼續數胡。
國米48小時兩戰冇貨賣

至於之前盛傳會被出售嘅賓施馬，依家重新納入賓尼迪斯嘅組軍藍圖，唔使再憂慮前途問題，集中精神比賽，上仗亦有波入，「BBC」鋒線可望重拾最巔峰水準，強如曼城都失4球，以國米近期低沉表現，更加抵擋唔住。

國米遇強即屈，繼0比1輸畀拜仁慕尼黑，前晚喺深圳嘅國冠盃中國站首戰，又以同樣比數不敵AC米蘭，球員跑動速度慢，明顯缺態。教練文仙尼承認惡戰完AC，48小時內又要對皇馬，賽程太過緊密，對球員體力係非常大挑戰，睇來冇乜信心喎。

值得一提，因為季前熱身賽關係，兩隊好大機會喺下半場大輪換，講到後備力量，皇馬亦遠勝國米，謝斯洛迪古斯、伊拿拉文迪、盧卡斯施華，甚至挪威神童馬田奧迪加特，都係獨當一面嘅球員。如果雙方換邊後出副選，皇馬都可以佔上風。