南韓少咗兩件主力 中國女足頭炮揾到食

猪拉多纳

東亞錦標賽開打

東亞錦標賽今日於中國武漢揭幕，打頭陣係女足賽事，聽日就輪到男足。中國女足經過多年低潮後，喺郝偉帶領下終於見到起色，暑假舉行嘅女子世界盃殺入8強，堪稱近期佳作，由於日本同南韓今次賽事未派最強陣容出戰，「鏗鏘玫瑰」係時候喺自己娘家威番鋪，首戰對南韓女足，樂比推介1.7倍中國女足主勝。（now633台周六晚上9:00直播）

中國女足今次派出最強陣容出戰，除補充咗4名新人外，其餘都用番世界盃班底，當中包括喺世界盃表現突出嘅王珊珊、王麗思、韓鵬同埋王飛等，備戰方面亦相當認真，早前同男子青軍隊踢咗兩場熱身賽，訓練強度相當足夠。

有傳今次賽事會係領隊郝偉告別戰，郝偉冇作出否認，但佢話明現時會集中精神爭取冠軍，由於佢同班女將關係一直非常好，所有球員都希望今次可歷史性奪冠，等郝帥可留下美好回憶。

翻查歷史，中國女足未曾喺東亞錦標賽封王，最叻都係拎亞軍，但對住南韓仍然有好大優勢，對賽35次取得25勝5和5負壓倒性佳績，最重要係南韓今屆賽事有多名主將缺陣，最為人熟悉嘅車路士名將池笑然，同埋响俄羅斯搵食嘅朴恩善都缺陣，冇咗佢兩個南韓實力可謂大打折扣。
日本難得受讓記住捧

另一場北韓女足對日本女足，雖然日本今次僅派出「二隊」出賽，踢過世界盃嘅僅得4個，而且多為後備，但日本女子足球嘅水平早已超越亞洲，就算派二隊出賽亦不容小覷，今仗對北韓難得受讓平半，樂比依然係睇好日本下盤！（now633台周六晚上6:20直播）