紅軍BF剛柔並濟 頭炮破城復仇

猪拉多纳

上季煞科日慘敗醜死怪

77日嘅等待，今晚正係利物浦嘅復仇良機！今夏豪掟近7,000萬鎊增兵嘅紅軍，今晚將造訪傷心地不列顛球場，佢哋上季煞科日喺度輸1:6，球員、球迷都記憶猶新。但報仇機會話咁快就到，紅軍新攻擊組合賓迪基（Benteke）同羅拔圖法明奴（Firmino）剛柔並濟，有新「BF」衝鋒陷陣，後防穿窿嘅史篤城係咁先，「紅軍」讓平半捧上盤。 （now621台周日晚11:00直播）

史篤城近兩季表現脫胎換骨，加埋利物浦新季步入「後謝拉特年代」，所以雙方今晚交鋒夠晒號召力，27,500張波飛晨早售罄，英國傳媒話，有黃牛黨將今仗波飛炒到300鎊1張，食水勁深！雙方最近一次交手係上季煞科日，當時利物浦作客輸1:6，係佢哋自1962年嚟喺正式比賽嘅最大敗仗，呢個仇唔報點得呀？

賽前利物浦主帥羅渣士話，睇見賽程一出，個心當堂雄晒，事關全隊上下都等緊機會做番齣好戲。羅帥信心咁強又難怪嘅，事關「紅軍」今夏喺轉會市場動作多多，除咗羅致尼達利基尼同中場兼新任副隊長占士米拿外，最大手筆就係法明奴同賓迪基兩大收購。巴西國腳法明奴能傳善射，有佢同「森巴」同胞菲臘比古天奴做策劃，攻勢實好睇，加埋夠晒實際嘅入球保證賓迪基打單箭頭，史篤城梗係大劑啦！
史篤城防線天殘地缺

之所以睇低史篤城，皆因隊長兼後防靈魂梳爾哥斯整親背脊，預計起碼缺陣兩個月。上季史篤城喺英超失波第6少（45球），梳爾哥斯同賀夫呢對中堅有好大功勞，家陣賀夫已經過檔李斯特城，霎時間冇晒一對中堅，通天老倌馬克威爾遜又話足踝有傷，領隊曉士今鋪焗用禾爾舒捷特同蒙尼沙鎮守後防中路，兩個二打六點頂得住利物浦嘅進襲呀？況且連最擅打反擊嗰件尼桑斯都過埋西維爾，就算「長人」高治踢得，都擔心佢哋連蛋都破唔到。