樸茅Hea鬥打比郡半場冇高低

猪拉多纳

英聯盃今晚深夜有場直播，兩支前英超球隊樸茨茅夫同打比郡對碰！話就話係前英超對決，但都係好多季前，主場出擊嘅樸茨茅夫已經落到英乙，對手打比郡就踢緊英冠。樸茅今季目標係升班，呢啲盃賽未必全力去兼顧，唔慌會搏；打比郡首戰表現未撻着，睇嚟今場大家都係hea住踢，半場和啱數。（TVB 301周四凌晨2時45分直播）

樸茨茅夫上周六英乙開咧戰大炒對手杜根咸3比0，賽後領隊保羅曲克豪言，今季以升班為目標，睇落打起晒信心咁款，不過要留意嘅係，英乙即係英格蘭第四級別，有幾叻大家心照，今場對手話晒係英冠球隊，相差咗兩個Grade，越級挑戰梗係睇定啲先啦。
「綿羊」未谷起寓賽於操

「綿羊」打比郡上季係威係勢，霸住個英冠一哥一段日子，可惜季尾大跌Watt，結果「衝超」失敗，連升班附加賽都冇得踢，呢股頹勢似乎延續到新球季，球隊開咧戰作客保頓冇乜表現，比賽尾段踢多個都贏唔到波，狀態擺明未操起，開季無耐就要踢呢啲盃賽，咪當寓賽於操囉，輕輕鬆鬆90分鐘算數啦，作客唔會太過飛沙劈石，今場一隊志不在此，一隊有心無力，半場和好路呀！