（六）26 熱刺 vs 史篤城 技術流對決 史篤城+1起刺

猪拉多纳

成日話英格蘭啲波硬淨得嚟踢法高Q大棍，單調乏味，今晚熱刺主場對史篤城一戰就畀大家見識下「技術流」對決！熱刺主帥普捷天奴戰術主張地面組織短傳入滲為主，史篤城簽埋「瑞士美斯」梳頓沙基利後，更正式成為「英超巴塞」，再唔係「成篤屎」！史篤城上季雙殺熱刺，今場受讓值得捧場！（now 621周六晚10時直播）

手榴彈戰術、頭槌攻門、硬淨防守，呢啲踢法統統代表住昔日嘅史篤城，但喺領隊曉士入主球隊兩季後，「成篤屎」已經搖身一變成為「英超巴塞」，今夏先從巴塞隆拿簽入翼鋒阿費利、艾奧利亞治，再以破球會紀錄嘅1,200萬鎊（約1.45億港元）買入梳頓沙基利，加埋正從重傷中復原嘅箭頭保贊，史篤城已經徹底變成技術型球隊！所以，今場面對同樣係控球型嘅熱刺，史篤城一啲都唔輸蝕。
熱刺哈利仔腳風唔順

加上熱刺王牌哈利卡尼腳風麻麻，連埋熱身賽，近5場入得2球，而對手只不過係FC悉尼同美職明星隊，睇嚟「哈利仔」想好似上季咁變做「哈神」，都要一段時間操起狀態。史篤城上季作客贏2比1，返到主場更3比0大炒對手，睇嚟熱刺領隊普捷天奴唔係幾識應付史篤城喎。