紅魔狂噬布魯日

猪拉多纳

為1億金礦冇情講

畀朋友同敵對球迷寸足成季，曼聯Fans今晚終於可以抬起頭做人，見證「紅魔鬼」重返歐聯舞台！曼聯新兵迪比逐漸同隊友擦出火花，加埋喺歐聯附加賽抽中布魯日呢支好籤，試問領隊尹戈爾又點會錯失今次歐聯掘金良機先？今晚首回合，1.85倍「讓球主勝」當然要捧啦！（有線61及201周三凌晨2:45直播）

歐聯冠軍獎金億億聲，遠嘅唔講，淨係講入到分組賽，當你1場都贏唔到依然有1,200萬歐元獎金落袋，加埋晉級嘅200萬歐元獎金，曼聯過到布魯日呢關即袋1,400萬歐元（約1.2億港元），你話率先喺奧脫福出擊嘅「紅魔鬼」點會唔搏盡吖！
「新7仔」迪比愈踢愈好

平心而論，曼聯頭兩場英超踢落的確係冇乜霸氣，兩戰分別以1:0小勝熱刺同阿士東維拉，但睇番上仗贏維拉場波，荷蘭翼鋒迪比明顯同桑馬達、朗尼等攻擊球員開始有火花，話唔埋今仗就係呢位曼聯「新7仔」嘅Show Time。加埋兩年前先為拜仁捧走歐聯錦標嘅舒韋恩史迪加，都大有機會喺今戰正選落場，「紅魔」齊晒架生，主場出擊搏到盡，鋒力夠晒得人驚。
布魯日7件主將打晒柴

嚟自比利時嘅布魯日，家陣由傳奇門將普荷美領軍，佢哋第3圈外圍賽以總比數4:2淘汰彭拿典奈高斯，陣中主力射手迪舒達仲特登延遲過檔貝沙，係都要幫布魯日踢埋曼聯先轉會喎！係好有雷氣嘅，之不過，布魯日整體實力低曼聯幾班，目前更加有包括中場列菲洛夫、基度斯、守將丹斯威爾同奧斯卡杜亞迪在內等7位主將養緊傷，而且「紅魔鬼」一向食住比利時球隊，3次喺歐聯分組賽前一圈出擊又永冇甩拖，布魯日今鋪去到奧脫福，聽抬蛋走人啦！