華倫冇態撐唔住

猪拉多纳

今晚歐聯外圍賽附加賽首回合重頭戲，西甲「蝙蝠兵團」華倫西亞主場迎戰法甲摩納哥。摩納哥上圈兩回合大炒瑞士年青人，表現比上屆打入8強時有過之而無不及，作客「蝙蝠洞」未驚過。華倫西亞聯賽未開咧，狀態蝕章，而且賽前更爆出奧達文迪罷踢風波影響軍心，讓球主客和華倫讓一球，捧讓球客勝。（有線61及201台周四凌晨2時45分直播）
新老結合換血有料到

西甲對法甲絕對係今屆附加賽其中一場最勢均力敵嘅對碰，華倫西亞只要晉級，便會有5支西甲球隊亮相分組賽，另一邊廂隨着巴黎聖日耳門日益壯大，近年法甲水準亦不斷提升，上屆便有兩支球隊殺入最後歐聯8強，包括今場主角之一摩納哥。摩納哥今屆進行換血，放走了中場干度比亞和前鋒貝碧托夫，其餘骨幹包括摩天奴、卡維奴、古沙華仍在陣中，同時間中前場補入了前鋒艾雲卡華利路、艾沙拉維、中場柏沙歷等90後小將，配合原有嘅安東尼馬迪爾、貝拿度施華等年輕好手，新老結合下經驗朝氣兼備，經磨合後整體發揮理想，上一圈外圍賽以總比數7比1大炒年青人，狀態弗爆勒都勒唔住。

摩納哥由於需要應付第3圈外圍賽，加上法甲比西甲早兩星期開咧，故摩納哥已進行4場正式比賽，狀態肯定比只靠熱身賽備戰嘅華倫為佳，何況華倫近4場熱身賽先後輸畀科仁、科隆及羅馬，而且3場比賽防線狂失10球，以咁嘅表現迎接呢場硬仗，實在唔樂觀。
奧達文迪罷踢亂軍心

此外，華倫西亞賽前仲要爆出壞消息，阿根廷中堅奧達文迪為免受傷影響轉會，竟然高調要求唔踢今場比賽，難免對陣內士氣有影響。目前華倫各方面因素均不及對手，讓波實在唔抵玩，捧摩納哥讓球客勝。