迅速入球騷恭候薩克達

猪拉多纳

另一場歐聯附加賽首回合，奧地利代表維也納迅速主場迎戰烏克蘭勁旅薩克達，論實力經驗客軍薩克達無疑勝一籌，但維也納迅速上圈踢走阿積士過程峰迴路轉，球員勝在有打不死精神，今場揀入球大。（有線64及203台周四凌晨2時45分直播）

薩克達係歐聯常客，對上5屆除咗有份參與分組賽，當中3屆更進身淘汰賽，實力可見一斑，不過佢哋上圈首回合作客土耳其費倫巴治都係打和0比0，要到次回合先顯出真功夫大勝晉級，從盤口上計今場客軍讓平半唔太穩陣。

維也納迅速球員名氣唔大，但勝在冇心理包袱，上圈面對5屆冠軍阿積士曾喺首回合落後兩球，最終追和2比2，去到次回合喺必需取得兩個作客入球才可出線嘅情況下，最終入夠三球贏3比2，足證呢班波踢法進取，入得又失得。維也納迅速今季戰績冇得頂，開季5戰4勝1和入14球，對手包括上季聯賽冠軍薩爾斯堡及格拉茨等名牌，首回合主場出擊唔會太保守，捧大啱數。