些路迪爭氣狙擊馬模

猪拉多纳

被對手寸唔夠班

歐聯附加賽首回合今晚繼續上演，蘇超冠軍些路迪喺主場招呼瑞超班霸馬模，熱捧1.49倍主W最好。兩軍教頭同樣來自挪威，但些路迪領隊朗尼迪拿已講到明，頂唔住馬模教練夏利迪嘅廢話，除咗嗌對方收口，梗係要喺球場上教訓吓對方啦！（有線62及202周四凌晨2:45直播）
些軍3猛將齊齊復出

些路迪日前喺聯賽主場以4:2砌低恩華尼斯，開季後走勢都幾順，而且喺聯賽坐波監嘅新前鋒施夫斯，今場可以披甲，加上隊長史葛布朗同中場史超活岩士唐已傷愈復出，最近簽入嘅喜伯年中場史葛阿倫又獲准上陣，大把好消息，難怪領隊朗尼迪拿咁有信心，可以喺首回合打沉對方。

馬模日前喺聯賽主場以2:0砌低加費萊，連贏3場反彈。不過咁，幾個月前馬模教練夏利迪已發炮，寸挪威同鄉朗尼迪拿帶嘅些路迪唔掂，仲話自己班波勁過晒些路迪、莫迪、洛辛堡同哥本哈根，屬於歐洲頂級二線球隊，激到朗尼迪拿躁晒話明要贏波，加上馬模有後衞高菲艾度停賽，出事唔奇囉！