皇馬挑機起革命

猪拉多纳

今季西甲周六凌晨揭開戰幔，冠軍仍屬「西超雙雄」皇馬同衞冕嘅巴塞之爭，「銀河艦隊」今夏特登請嚟傳說中嘅「魯營不敗男」賓尼迪斯回巢掌舵，擺明想剋住「地上最強」，「肥賓」換親東家首季必有盃落袋，甚至不惜硬捧加里夫巴利代替C朗做頭號王牌，誓要掀翻巴塞王朝。

雖然皇馬今夏搵賓尼迪斯代替「肥安」安察洛堤執掌帥印，好多粉絲都覺得佢Out Out哋，但呢位「銀河艦隊」出身嘅教頭份CV靚到爆，包括擸過歐聯同歐霸等重要錦標，而且自2001年開始，佢每逢轉飯鑊嘅第一季實有盃落袋，最威水梗係05年為利物浦奪歐聯同14年率拿玻里捧意盃，所以「首年捧盃運」真唔講得笑。

查實賓尼迪斯被喻為「魯營不敗男」，佢執教華倫西亞同利物浦期間，4度造訪巴塞魯營球場取得3勝1和佳績，皇馬最大敵人梗係巴塞喇，作客魯營之役往往成為爭取聯賽錦標關鍵，「肥賓」作客魯營咁有計，難怪被睇中。
冒險用巴利取代C朗

肥賓上任後奉會長皮里茲「旨意」重組班底，送走影響力大嘅隊長卡斯拿斯，並喺陣中擁有艾斯高、莫迪歷、卻奧斯等「鎖匙人」下，刻意叫快翼加里夫巴利移入中間做進攻中場，擺明捧佢上位，仲話前鋒一定要做好壓迫協防，似係暗寸唔防守嘅C朗。其實肥賓一來想改善安察洛堤時代球員鬆散嘅紀律，二來係核心C朗都「三張嘢」，扶植細佢4年嘅加里夫巴利做頭號王牌，為未來鋪路亦屬正常。

皇馬今夏雖冇乜轟動增兵，只係買咗高華錫、卡斯米路同丹尼路雷斯等，但論質素同板櫈深度略勝巴塞一籌，賓尼迪斯嘅「成名絕招」4-2-3-1陣式，可為皇馬帶來攻守平衡，不過「肥賓」點處理做慣大佬嘅C朗改變角色同心態，將成為佢能否打破自己自04年後再捧聯賽錦標關鍵。