西維爾翻轉馬拉加

猪拉多纳

歐洲各大聯賽陸續開鑼，今晚西、德、法好戲連場！西甲揭幕戰，馬拉加主場對西維爾，上季「老五」西維爾雖然出售射手卡路士巴卡、翼鋒阿歷斯維度，但亦簽入意大利前鋒恩莫比尼、烏克蘭快翼高路比恩卡，整體實力仍得以保持，早前歐超盃亦同巴塞激戰至加時僅落敗。反觀，馬拉加痛失「進攻鐵三角」桑美占美利斯、森姆加西亞、森姆卡斯迪利祖，無力增兵，實力打折扣，受讓都冇着數，力捧西維爾客勝。

（now 632周六凌晨2時30分直播）

雖然西維爾級數同巴塞、皇馬、馬體會有距離，但始終屬於西甲實力分子，連續兩屆奪得歐霸盃冠軍。陣中主力自然惹來豪門垂涎，兩位捧盃功臣卡路士巴卡、阿歷斯維度，分別被AC米蘭同巴塞隆拿撬走。不過西維爾反應快，借用多蒙特前鋒恩莫比尼，簽入上屆歐霸盃決賽對手迪尼普快翼高路比恩卡、車仔前鋒卡古達、史篤城中場尼桑斯、AC米蘭中堅阿爾拉米。配合原有主力加美路、雷恩斯、班尼加，整體人腳仍不俗。

西維爾早前歐超盃即使處於劣勢，仍能逼和巴塞4比4，直至加時先至輸4比5，可見攻力並冇因卡路士巴卡、阿歷斯維度離隊而受影響。當然球隊防守麻麻，但以馬拉加嘅實力，應該難以西維爾後防構成太大壓力。
馬拉加放售主力風光不再

馬拉加近年處於財困，季前出售3位進攻主力桑美占美利斯、森姆加西亞、森姆卡斯迪利祖，3人上季為球隊攻入14個聯賽入球，佔球隊總入球三分之一，佢哋離隊對馬拉加影響有幾大，可想而知。會方補充些路迪前鋒查里斯，但礙於質素有限，相信難有大貢獻。況且西維爾上季「雙殺」馬拉加，有埋往績支持值得再追。