捧紅魔有着素

猪拉多纳

朗尼怒擸架生 砰砰聲打「鵲」

今晚英超重頭戲曼聯主場對紐卡素，近期全世界目光都集中喺新「金7」迪比身上，搞到隊長朗尼不是味兒，話輿論將佢嘅失準無限放大，太唔公平，揚言今仗必破9場入球荒。撞啱「喜鵲」紐卡素大換血後未企穩陣腳，朗尼正好把握機會全力數胡，省番靚紅魔首席射手金漆招牌。一於信朗尼，直取曼聯讓球主勝。（now621周六晚7時45分直播）
高調反擊網民嘲諷

迪比周中歐聯附加賽貢獻兩入球一助攻技驚四座，即時被封紅魔「新金7」，但同時亦令已經9場波冇士哥嘅朗尼黯然失色，更惹來網民冷嘲熱諷，認為佢嘅時代已成過去。不過朗尼身為紅魔史上入波第3多嘅球員，當然抵唔得頸要反擊：「對維拉一役我表現水準之下，但唔應該只注意我失準嘅比賽，上仗歐聯對布魯日我表現唔錯，本來可以入一、兩球。我以前都經歷過入球荒，但我有預感對紐卡素將會有波入。」朗尼團火愈熱愈旺，似乎係時候嚟料。

事實上，除咗朗尼之外，迪比、桑馬達、艾舒利楊格，甚至後備贊奴沙，狀態都相當弗，曼聯入波唔成問題。而且球隊喺歐聯附加賽首回合，已領先布魯日兩球，減少一大後患。曼聯今季開局3戰全勝順到冇朋友，領隊尹戈爾嘅改革似乎開始踏入收成期，今仗對住實力平平嘅紐卡素，有望贏多場漂亮勝仗。
紐卡素換帥有排執

紐卡素近年喺商人艾殊利主政下，成績每況愈下，更不時傳出賣盤消息，搞到人心惶惶。即使今季請來麥卡倫執教，球隊亦進行換血，簽入咗韋拿杜姆、贊素梅賓巴、阿歷山大米祖域等新球員，似乎有啲起色。不過，新帥同新兵始終需要時間磨合，開季兩戰錄得1和1負，失咗4球，上輪作客史雲斯都淨吞兩蛋，睇嚟隊波仲有排執，今仗去到奧脫福鬥大勇嘅曼聯受讓都冇着數，隨時輸得更甘。