鯨魚第一隊入球好路

猪拉多纳

砌FC東京搶慣頭啖湯

日職球隊名古屋鯨魚近況雖唔算標清，今日主場對FC東京，就有一個數據值得留意。唔講唔知原來鯨魚對上7次鬥FC東京，竟然有6次可以先開紀錄，加上FC東京陣中傷兵滿營，後衞森重真人又要停賽，阿謙深信鯨魚可以先開紀錄帶挈捧場客收錢，「第一隊入球」捧鯨魚。（周六下午6時開賽）

早前經歷主場慘吞橫濱水手3蛋後，鯨魚上星期安排踢完東亞錦標賽嘅射手川又堅碁同永井謙佑重返正選陣容，作客總算以1比0砌低松本山雅重響勝鼓。雖然鯨魚呢場波贏得唔算太夠霸氣，但球隊面對今仗對手FC東京，往績上近7次對戰竟有6次可以先開紀錄，呢項數據值得大家記住。
紅鑽連勝追殺維加泰

FC東京上周喺主場以2比1擊敗大阪飛腳已連贏2場，但佢哋近期受嚴重傷兵問題困擾，後衞太田宏介、門將權田修一剛加入傷兵名單，加上後衞森重真人因為停賽肯定缺陣，意味球隊防線至少有3名正選球員要避戰，今仗再遇鯨魚先失守嘅機會好大，阿謙捧鯨魚「第一隊入球」。

另一場推介係直播賽事，由浦和紅鑽主場對仙台維加泰，紅鑽近兩場贏波已重拾信心，今仗雖有中場關根貴大停賽同石原直樹唔踢得，但前鋒三藤雄樹今仗倒戈相信會踢得分外落力。維加泰近五仗作客未贏過，加上射手威爾遜洛迪古斯同後衞渡部博文因傷缺陣，對球隊影響甚大，今仗作客都係等做「炮灰」，阿謙決定直取紅鑽讓球主勝。（有線64台周六下午5時30分直播）