馬體會豪裝贏到彭彭聲

猪拉多纳

馬德里體育會喺西甲開咧有望取得個好開始，首戰主場迎戰升班球隊拉斯彭馬斯，唔贏兩粒或以上真係對唔住班粉絲呀！「床單軍團」今夏有幾個主力轉會，但亦簽入多位猛人，今場難得對住弱旅，梗係要大勝一場打響頭炮，阿King熱捧讓球主勝！（now 632周日凌晨2時30分直播）

馬體會今年獲最近榮登亞洲首富嘅中國富商王健林入股，有條大水喉射住，縱有阿達杜倫、文迪蘇傑、祖奧米蘭達等主力離隊，主帥施蒙尼即刻瘋狂入貨，「拉丁舞王」積臣馬天尼斯腳法細膩兼入球能力強，肯定唔差得過文迪蘇傑，另一前鋒韋圖潛力極大，隨時做後備殺手。「床單軍團」日前仲有好消息，後防大佬高甸續約至2019年，今場梗係要贏得好好睇睇，唔好出醜畀拉斯彭馬斯入波喇！升班仔拉斯彭馬斯今場仲要有中場古利奧及門將查維拿華斯停賽，到訪馬德里唔係唔交番啲過路費呀？
列斯聯補鑊捱「細」界

阿King仲想講埋兩場英冠直播賽事，頭場列斯聯主場對錫周三，列斯聯上場作客布里斯托城，領先兩球被逼和，領隊路斯拿嬲到震，今場一定要班波做好防守，細盤值捧。（TVB 301周六晚7時30分直播）另一場查爾頓主場迎戰侯城，雖然侯城實力較強，但連埋英聯盃一仗，侯城開季踢咗4場，當中兩場勝仗喺主場取得，其餘兩場作客都贏唔到，今場作客對狀態不俗嘅查爾頓，要贏一啲都唔易，捧受讓嘅查爾頓！

（TVB 301周六晚10時直播）