馬體會讓主依「斯」執

猪拉多纳

燒11億增兵 開鑼戰唔衰得

阿達杜倫、米蘭達、文迪蘇傑輪住走，馬德里體育會睇落係畀人拆骨，實情佢哋今夏掟咗1.26億歐元（約11億港元）出嚟擴軍，重點收購係一對箭頭積臣馬天尼斯同韋圖，加埋鎮隊之寶基沙文，呢個攻擊鐵三角食硬今晚對手拉斯彭馬斯啦！一於捧1.55倍「讓主」，熱撐「床單兵團」敲響新季西甲頭炮。（now632台周日凌晨2:30直播）
高甸續約至2019

馬體會上季衞冕西甲失敗，唔多唔少都係因為冇咗迪亞高哥斯達呢位多產射手，主帥施蒙尼對症下藥，分別從波圖、維拉利爾掃入積臣馬天尼斯同韋圖。佢兩個去季喺所屬球會都係入波保證，有呢兩件射手衝鋒陷陣，加埋「左腳王」基沙文鋪橋搭路，火力明顯比上季「升呢」。咁都未算勁，「床單兵團」守將高甸賽前同會方續約至2019年，粉碎過檔曼城傳聞，消息肯定令士氣大大提升。
拉斯彭馬斯唔夠班

對家拉斯彭馬斯靠升班附加賽重返西甲，季前最大收購已經要數到巴拉圭中堅艾卡拉斯，呢位仁兄昔日喺韋根、愛華頓攞牌多過食飯，而且甩漏又多，試問點信得過先？最得人驚係呢班波仲要靠年屆40歲嘅華拿朗派牌，今晚去到馬體會地頭，想唔輸大大鑊都難！