車仔征西隨時中伏

猪拉多纳

今晚英超早場重頭戲，衞冕嘅車路士作客西布朗，車仔開咧兩戰未贏過，領隊莫連奴急急簽入柏度洛迪古斯幫手，希望盡快撻番着副偈。不過唔知係咪巧合，「寸王」最近6次喺聯賽「炒車」，都係衰喺「P」字頭主帥帶領嘅球隊手上，其中兩次就係不敵今仗對方西布朗嘅教頭佩尼斯(Pulis)，既然「P煞」咁鬼邪門，斯維一於捧受讓嘅西布朗讓球主勝。 （now 621周日晚8時30分直播）
後防穿窿前鋒疲軟

上季盟主車路士開咧甩晒轆，兩戰不勝兼失咗5球，一向固若金湯嘅穩健防守突然穿窿，以上仗對曼城為例，如果唔係代替停賽嘅泰拔高圖爾斯把關嘅比高域屢救險球，車仔點只吞3隻光蛋咁少？無論伊雲洛域、泰利定加利卡希爾，均屬轉身速度偏慢嘅守將，咁啱防中尼曼查馬迪又失準，法比加斯嘅表現更猶如夢遊，二人未能喺防線前築起堅實屏障，令後面幾位守將忙到出煙，自然頻頻蝦碌。

此外，上季弗到震嘅神鋒迪亞高哥斯達仍未開齋，借來嘅「老虎」法卡奧繼續冇貨交，令車仔前線死火，領隊莫連奴見勢色唔對，日前截曼聯胡急簽巴塞前鋒柏度洛迪古斯，希望盡快Tune番靚副偈。不過依家班波咁沉，唔係話柏度一嚟就會搞得掂。況且車仔今次仲要撞正「P煞」 擋路，事關佢對上6次喺聯賽輸波，咁蹺都係輸畀姓氏「P」字頭嘅主帥帶領嘅球隊（見附表），唔單止上仗嘅曼城領隊比歷連尼，仲有今仗對手西布朗嘅教頭佩尼斯，你都咪話唔邪呀！
西布朗都識泊大巴

佩尼斯最擅於喺限米煮限飯下激發球員潛能，前季中途接手水晶宮最終能奇迹留級，關鍵就係當年3月尾擊敗車路士，之後5連勝成功上岸，上季季尾帶領西布朗再一次擊敗車仔，可見唔係撞彩。而且講到泊大巴，佩尼斯比莫連奴不遑多讓，如果西布朗死守，以車仔依家咁弱嘅火力，實在好難咬得入，讓球主客和車仔讓一球，斯維撐西布朗讓球主勝。