連勝斷纜 網民睇淡 松鼠踢爭氣波極速反彈

猪拉多纳

大宮松鼠嘅日乙8連勝走勢斷纜，今日又有中場核心家長昭博停賽，咁係咪代表佢哋會沉落去，今日主場連群馬草津溫泉都贏唔到呢？恐怕未必，因為佢哋今季好少連續失分，2.18倍「讓球主勝」仲係抵博嘅。
29場轟54球

火力冠絕日乙

睇吓家陣個日乙積分表，大宮拋甩「老二」磐田山葉16分，照計連輸5場都唔驚畀人過頭。可能呢個原因啩，日本Toto網個民意投票，出現一個反常現象，大宮W得31個巴仙票數支持，有69個巴仙嘅人相信群馬贏到波，簡直離奇！

雖則群馬兩連勝係威係勢，不過佢哋响日乙正式賽事只對過大宮一次，主場都輸0:2，即使加埋另5次友賽，總對賽往績亦得1勝5負，根本兩隊波完全唔同班。當然，大宮主將家長昭博响上仗輸畀愛媛1:3場波，因為腳痕踢爛廣告牌，被裁定「故意損壞公物」，畀J聯賽紀律小組判罰停賽兩場，削弱咗大宮嘅中場組織力，但都不足以作為群馬W硬嘅論據，東瀛波迷嘅反常選擇，似乎係捉大宮放鬆咗嘅心理居多。

事實上，大宮29場波能夠入到54球，火力冠絕日乙，要贏平均每場失1.2球嘅群馬唔難。更重要嘅係，群馬主要靠中場江坂任、吉濱遼平同前鋒野崎桂太3個入波，大宮要凍結佢哋唔難，呢場波主隊可謂立於不敗之地，問題在於入到2定3球啫，冇理由唔博「讓球主勝」。