哈特普爾大盤冇甩拖

猪拉多纳

英聯盃嚟到第2圈賽事，有唔少英超球隊都會加入戰團，其中包括上周末首次嘗到頂級聯賽勝仗滋味嘅般尼茅夫，將會作客英乙球隊哈特普爾。般尼茅夫現時士氣如虹，面對低組別球隊更會搶攻，但哈特普爾主場亦有一定威力，今仗唔會踢守勢波下相信入球唔會少，阿謙推介大盤。（TVB 302周三凌晨2時45分直播）

般尼茅夫上周六英超作客韋斯咸贏4比3，攞到球隊125年嚟首場頂級聯賽勝仗，其中前鋒哥林威爾遜大演「帽子戲法」，令人眼前一亮，今仗相信會繼續肩負球隊嘅入球重責。般尼茅夫過去多次同哈特普爾喺英甲交手，雙方都互有勝負，心理優勢唔差得遠，今仗雖有中場哈利艾達、沙恩麥當奴同基斯甸艾素有傷唔踢得，但心雄下作客都會照樣踢得進取。

哈特普爾喺英乙頭4場贏晒，雖然上周六作客0比2輸畀史提芬納治，但球隊開季頭兩場主場賽事都贏波，可見喺自己地頭出戰始終有保證。哈特普爾今仗雖有門將杜利華卡臣同後衞佐敦李察士有傷唔踢得，但前鋒彼恩達開季頭3場賽事都有「士哥」，今仗主場面對般尼茅夫唔算太穩健嘅防線，絕對有權攞到入球，大盤值得支持。
史篤城明恰英乙仔

另一場英乙嘅盧頓主場對英超史篤城，盧頓開季表現麻麻，喺聯賽仲未贏過波，只係喺上圈擊敗布里斯托城晉級，可見狀態一般。相反史篤城雖同樣喺英超未開齋，但球隊近兩場作客都打和，證明狀態唔算差，今仗作客對住實力差一大截嘅盧頓，相信有望大勝打開今季勝利之門，一於捧讓球客勝。

（TVB 301周三凌晨2時45分直播）