中央陸軍圍攻士砵亭

猪拉多纳

食住個勢收復失地

老闆畀得你秘撈，本身份工就梗係要做得好好睇睇啦！好似莫斯科中央陸軍教頭施盧斯基咁，家陣兼埋俄羅斯領隊嚟做，如果中央陸軍入唔到歐聯分組賽，冇咗舊肥豬肉點交代呀？今晚歐聯外圍賽附加賽次回合返主場再鬥士砵亭，主隊讓平半，梗係捧上盤，撐中央陸軍收復失地啦！（有線62及202周四凌晨2:45直播）
首回合陸軍輸得唔抵

中央陸軍會長真拿早排開綠燈，批准施盧斯基接手卡比路個爛攤子，暫時兼職做埋俄羅斯國家隊主帥。大家都知只要入到歐聯分組賽，獎金足足有過千萬歐元，施盧斯基為公為私都唔衰得，今晚返主場，肯定傾盡力反撲。佢哋剛啱喺俄超憑戴沙高耶夫絕殺入波，以2:1造低羅斯托夫，士氣如虹。

首回合士砵亭贏2:1，如果中央陸軍前鋒杜姆比亞唔係有球12碼宴客，家陣嘅形勢已經唔同晒，但亦反映士砵亭首回合踢落查實唔係咁叻。呢支葡超隊伍對上14場歐洲賽作客賽事錄4和10負戰績，巴西27歲左閘謝法臣拿斯文圖仲要傷埋，去到決心反撲嘅中央陸軍地頭，睇怕都好難全身而退咯。