愛華頓超「班」上盤捧得過

猪拉多纳

英超開季3戰得1勝，愛華頓今晚係時候做番齣好戲。「拖肥糖」會喺英聯盃次圈造訪「甲組仔」班士利，盧卡古上場聯賽畀曼城隊長高柏尼嘜到一棟都冇，今鋪肯定要搵班士利祭旗出番啖氣。愛華頓讓半一，捧上盤最明智。

（TVB301周四凌晨2:45直播）

話就話愛華頓開季戰績曳，但自從開鑼戰失分畀屈福特之後，呢班波嘅表現明顯好咗，次輪聯賽大勝修咸頓3蛋，跟手輸畀曼城場波查實踢得唔曳，打番對「藍月亮」呢場波嘅水準嘅話，班士利邊係「拖肥糖」手腳吖？
班士利升班要緊

況且「新魔獸」盧卡古上仗畀比利時同胞高柏尼睇到實，唔搵班士利出氣就勢係假！消息話養傷多時嘅左閘白賴仁奧維度已經傷愈，迪路菲奧同賴史密夫等攻擊球員亦會正選落場，火力同決心都毋庸置疑。

對家班士利開季戰績唔錯，近3場聯賽錄2勝1和戰績，不過領隊李爾莊臣賽前表示，今季目標始終係爭取升班，英聯盃會唔會去到咁盡真係有保留。加上班士利陣中最好打嗰件，已經要數到澳洲小國腳翼鋒賴恩威廉士，咁嘅班底，想輸少球都難。