阿仙奴小勝收工

猪拉多纳

紐卡素繼上周六英超頭場守和曼聯後，今晚再次打頭陣，返主場硬撼另一勁旅阿仙奴。「喜鵲」今夏狂燒近5,000萬鎊擴軍，矢志一洗上季幾乎降班嘅頹風，不過「兵工廠」最近7次碰頭都贏晒，甚有格食格味道，只係客W得1.5倍略嫌乏味，睇番佢哋近年造訪聖占士球場都係贏一球，蘇豪覺得今仗頂盡小勝一粒，不如冷敲3.4倍讓球和！

(now 621周六晚7時45分直播)
紐卡素擴軍 戰鬥力升呢

紐卡素上季季尾連敗多場，搞到跌落下游掙扎，直到煞科日擊敗韋斯咸先至宣告上岸，今季痛定思痛，任命前英格蘭主帥、曼聯助教麥卡倫領軍，麥Sir竟能說服孤寒老闆艾殊利斥資近5,000萬鎊增兵，結果新陣容令球迷眼前一亮。「喜鵲」中前場3大新兵韋拿杜姆、泰奧雲及阿歷山大米祖域同屬當打兼高質，防線新將贊素梅賓巴演出對辦。球隊上場守和曼聯，泰雲奧後備上陣，其餘3人正選披甲，踢起嚟四平八穩，證明鬥強隊死守不易大敗。

阿仙奴今季由車路士簽入星級門神施治，被傳媒形容為近年最齊腳，球隊備受追捧搞到愈讓愈辣，聯賽首戰主場對韋斯咸讓球半/兩球，結果淨吞兩蛋波盤齊輸；次輪作客水晶宮讓半一，僅憑對手擺烏龍贏2比1，盤口只贏半格，上仗主場0比0打和利物浦，讓半一又輸盤，認真靠唔住。目前阿仙奴除咗韋舒亞仲養緊傷外，兩大中堅梅迪薩卡及哥斯尼又未知能否趕及復出，若續用哥林張伯倫拍基比爾包列斯達，你都咪話唔牙煙。
近績雖贏晒 作客唔易食

好彩，近年交手戰績完全一面倒，阿仙奴連續7次擊敗紐卡素，賽績硬淨，預期今場仍然夠贏。上文提及「兵工廠」近3次作客紐卡素都小勝一球，此外，計埋上季戰績，球隊對上6次聯賽作客贏波，其中5場又係贏一球，當中包括去季以2比1戰勝紐卡素，既然阿仙奴開局演出一般，作客「喜鵲」就算贏都唔慌會輕鬆，頂盡咪又係小勝一粒，讓球和有3.4倍非常值博。